Եվա՞ն կչեզոքացնի Ադամին

HZHAM-ին հասած տեղեկությունների համաձայն, այսօր՝ ապրիլի 6-ին, Գեղարքունիքի մարզի Մաքենիսի միջնակարգ դպրոցի տնօրենի թափուր պաշտոնի համար հայտարարված մրցույթը չի կայանալու։ 
Բանն այն է, որ արդեն որերրորդ անգամ հայտարարված մրցույթը տապալվում է՝ մարզային ներկայացուցիչների բացակայության պատճառով, այդպիսով խոչընդոտելով միակ թեկնածու՝ ՀՅԴ-ական, նախկին տնօրեն Ադամ Մխիթարյանի ընտրությանը։
Պարզվում է, որ մրցույթի տապալումը երկու դրդապատճառ ունի՝ քաղաքական եւ անձնական։
Առաջինը պայմանավորված է Ադամ Մխիթարյանի ՀՅԴ կուսակցության անդամը լինելով, ով 2021թ-ի հունիսի 20-ի ԱԺ ընտրություններին ընդդիմադիր «Հայաստան» դաշինքի վարկանշային թեկնածուն է եղել։
Երկրորդ պայմանը՝ նախկին մարզպետ, այժմ ՏԿԶ նախարար Գնել Սանոսյանն իր խնամու հարսին Լճավանի դասվարներից մեկին ցանկանում է կարգել Մաքենիսի դպրոցի տնօրեն, սակայն երիտասարդ կինը ո՛չ աշխատանքային ստաժ ունի, ո՛չ տնօրենի հավաստագիր։
Այդպիսով Գնել Սանոսյանը ներքին հրահանգ է իջեցրել՝ տապալելով մրցույթը ժամանակ շահել, մինչեւ իր յուրայինը հավաստագիր կհանի, իսկ ստաժի հետ կապված խնդիրը ինքը կլուծի՝ օրենքը շրջանցելով։
Այս առնչությամբ փորձեցինք մեկնաբանություն ստանալ Ադամ Մխիթարյանից, ով հեռախոսազրույցի ժամանակ հայտնեց, որ ինքն էլ է կարծում, որ այսօրվա  մրցույթը չի կայանալու, իսկ մյուս հարցերի առնչությամբ մեկնաբանություն չտվեց, ասելով, որ մայիսի 10-ին ինքը ասուլիս է հրավիրելու ու խնդիրը կբարձրաձայնի։
Աննա Գրիգորյան